IELTS Passing Brief guide
كيف ذاكرت IELTS لأول مرة فى أسبوعين والزتونة متشفية عالآخر يعني
المقال طويل وشامل كل حاجة كيف
لو انت عارف بالفعل الي محتاجه وهنا عشان الماتيريال تقدر تلقاهم على هذا اللينك ولينكات المصادر والمواقع في القط 6،7،8،9
امتحان IELTS ايه وفين وبكام والحجز ؟
- العالم عشان يعتبرك معاك لغة عايز منك شهادة معترف بيها دولياً، وهي TOEFL أو IELTS وهو نوعين: ( General) ممكن تقدم بيه على هجرة أو عمل أو تدريبات دولية أو لو أى جهة طلبت منك شهادة لغة، فيما عدا الدراسة الى هتحتاج (Academic).
الفرق بين الإثنين: يكون في مستوى صعوبة ونوع المواضيع في جزئي الكتابة والقراءة فحسب الأكاديمي مواضيعه بيكون بعضها علمية أو ثقافية متخصصة وأطول من مثيلتها في General.
- السكور من 9 لكل فرع و بيحتسب من 9 للمجمل. 9 دي يعني ناقص درجة أو مقفل وده شئ زى الكبريت الأحمر كده نادر الحدوث. 8 للشاطرين في اللغة جداً أصلاً وذاكروا كويس كمان. متوسط الناس الشاطرين بردو بييجوا من أول 6 ل 7.5 لأن ممكن يكون درجته عالية فى فرع ووقع فى فرع وهكذا ، فمتتخضش من السكور.
- تكلفة الامتحان في مصر 2150 جنيه، والامتحان في مكانين British council / IDP .
Britisch council أفضل من تجارب الناس يعني، والامتحان بيعقد في عدة محافظات مش لازم تسافر القاهرة، وانت بتحجز أختار المكان الأقرب ليك لو مفيش في محافظتك.
- الحجز بيكون انك تدخل الموقع تدخل بياناتك وركز فيها عشان دى الى هتدخل بيها الامتحان، وتاخد رقم وتدفع في أى فرع من فروعهم خلال ثلاث أيام من الحجز أو بفيزا دفع على الإنترنت.
_ وانت بتحجز ليك فرصة ان النتائج بعد ظهورها تتبعت مباشرة نسخة منها لثلاث جهات ( زى جامعات مثلا)، يفضل انك تحددهم، لأنك لو محددتهمش هتدفع رسوم بعد كده لو طلبت إرسالهم. - مدة صلاحيةة الشهادة سنتين.
- أحضر في وقت أد ايه وأجيب سكور كام وأحجز امتى ؟
- أولاً التحضير للإمتحان نفسه شئ وتعلم اللغة نفسها شئ، فبعيداً عن جو البوستات والنصائح الطويلة العجيبة عن إزاى تحسن لغتك أصلاً والحلول الأسطورية دي، انا هنا بتكلم على التحضير للامتحان نفسه( الي بيحتاج مجهود وتدريب) بعيد عن مستوى لغتك مهما كانت، لكن هنفترض ان مستواك متوسط وعادي وهتبدأ تذاكر.
- أنا مستوايا advanced وذاكرت في أسبوعين بمتوسط خمس ست ساعات مذاكرة صافي في اليوم، لكن كانت ضغطة كبيرة وكل ما يكون في وقت هيكون النتيجة أحسن.
الدرجات كلها كانت 6.5 ما عدا الكتابة 5 لسبب بسيط ( أنى ملحقتش أحل task 1 كتبت فيها سطر من 150 والوقت خلص) فيعتبر انى جايبة 5 من 6 (درجة تاسك 2) يعنى وده شئ كويس جدا يعني نظرا لمدى قلقى من الجزء ده. ففي المجمل ما أود اختصاره هو، الامتحان ملوش علاقة بمستواك في اللغة ولازم تتمرن وتذاكر له هو تحديدا وتدى نفسك وقت كفاية.
- النصيحة الذهبية هى احجز الامتحان وبعدين ذاكر عشان محدش بيذاكر للمدى البعيد إلا لو عنده عفريت إلتزام داخلي وفاضي موراهوش حاجة، الوقت المتوسط للإلمام بالأساسيات من شهر لشهرين حسب الوقت الى هتديه للمذاكرة ومستوى تحصيلك ومستوى لغتك وكل ما تزود الوقت ده هيكون افضل لكن مش بالضرورة يبقوا متوزعين على شهور زيادة ، وانما المحصلة النهائية تكون بتقعد تذاكر ساعات زيادة وتحصل معلومات وتتمرن عالحل.
- عامل إزاى الامتحان ؟
- اربع قطع استماع بيشتغلوا ورا بعض بدون إعادة فى نصف ساعة +
10 دقائق تنقل الإجابات في شيت ، 3 قطع قراءة في ساعة الاتنين عليهم 40 سؤال كل سؤال بدرجة. + جزئين كتابة في ساعة.
- نذاكر ايه وإزاى وإمتى ومين رايح فين وهكذا؟
1. إيدك معايا وإفتح واحد من الامتحانات المرفقة تحت تصفح امتحان كاملاً بهدوء كده واقرأ كل الأسئلة وخد فكرة واشتري بكرة. كده انت عرفت حجم وشكل الامتحان وخدت الخضة الأولانية خلاص، وأدركت موقعك فين من الليلة دي، اطبع بقى الامتحانات من أول 8 لحد 12 (نزل مؤخراً) وانسى المذاكرة من الكمبيوتر لأن الامتحان ورقي ولازم تتعود عالكتابة والتعامل مع الورق وترجع تحسن خطك وتكتب بسرعة.
2. كورس edx عبارة عن متخصصين هياخدوا معاك الامتحان تفصيلة تفصيلة شرح وحل وأمثلة بشكل مطول ( تحذير: وممل )، لكن لا مفر منه، لأن كل المصادر الأخرى هتحسسك انها مش مرتبة وواقع منك حاجات ومفيش مصدر مغطي كل حاجة. خد الكورس كامل وحل كل الكويزات والمهم ده يكون بتركيز وخد Notes واحفظ التمارين المهمة سكرين على جهازك او اطبعها، هتحتاج تراجعها.
* الامتحان له طريقة حل لكل سؤال عشان تقدر تخلص في الوقت المطلوب، وده الى الكورس هيزودك بيه.
3. الكورس له عيبين، الملل والتكرار ، ومستوى الأمثلة الى بيمرنك عليها بسيط بالنسبة لأسئلة الإمتحان. حل ده الأتي:
1. كل جزء تذاكره في الكورس وليكن الاستماع روح اتفرج على فيديوهات ليه من المصادر الإضافية في نقطة (6). المصادر دي هتزودك بتكنيكات مختلفة عشان تختار منها الأنسب ليك وهتكسر حدة الملل لأنها سريعة وكل يوم هتقدر تخلص 3 أربع فيديوهات بسهولة. خصص كشكول للمذاكرة خد فيه Notes وده مهم جداً، و بما إنك أخدت الكورس اكتب ال tips الجديدة بس. مثلا: طريقة حل reading انك تعمل skim & scan ، في تكنيك تانى سجله.
2. حل على كل نوع من الأسئلة أمثلة كتير في نفس الوقت الى انت بتذاكر فيه، متنتظرش أما تخلص الكورس والفيديوهات عشان تبدأ حل لأنك هتكون نسيت والكلام دخل في بعضه. الحل من المصادر دي
- كورس Road to IELts بتاخد ID تدخل عليه مجانا لو بتمتحن مع ال British council
- http://ieltsonlinetests.com/catalogue مكتبة إمتحانات online شاملة
- كل المواقع (6 ) فيها نماذج امتحانات.
مثلا : اتعلمت طريقة حل سؤال Multiple questions وشفت فيديو او اتنين عنه لميت كل النصائح طبق بقي حل مرتين تلاتة.
4. خلصت كل جزء من أجزاء الامتحان الأربعة ( قراءة ، كتابة ،استماع، محادثة). هات النسخة 7 و 8 (لأنهم الأقدم ) من امتحانات كامبردج وحل الجزء على بعضه وانت مشغل stop watch ، واحسب لنفسك درجتك فيه ( ده موقع بيحسب السكور http://www.examenglish.com/IELTS/IELTS_Band_Score_Calculator.html)
5. قبل ما تسيب كل امتحان اعرف غلطت في ايه وانت بتراجع الإجابات وايه الى بياخد منك وقت وايه الى بتقع فيه كتير، وارجع تانى بص في كشكولك راجع الملاحظات الى اخدتها اثناء المذاكرة عشان تفتكر طريقة الحل والأخطاء الشائعة وتحسن أدائك. مهم جداً انك تطبع الامتحان وتحله ورقي، وتنقل الإجابات في نموذج ورقة الإجابة، وتلتزم بالوقت تماما، لأن ده الى هيحصل فى الامتحان ولا ثانية زيادة هيسيبوك تمسك فيها القلم. ومع الحل كل مرة هتلاحظ تحسن أدائك وتعودك على الحل وطرقه وتبتكر كمان لنفسك طرق لتقليل هدر الوقت ودرجاتك هتتحسن.
6. في مواقع كتير جدا ومصادر هتتوهك وتلخبطك ، وأكتر وقت راح منى فى التحضير راح في المقارنة بين المصادر واختيار الأنسب والأفضل في كل جزء وها هنا الزتونة بعد طول لف. دى قنواتهم عاليوتيوب و تحت كل فيديو لينكات وإضافات فى مواقعهم. ذاكر الفيديوهات مع الكورس أثناء فترة جمع المعلومات زى ما اتفقنا.
Emma English
IELTS Simon
7. الكتابة الى مدوخانا كلنا عبارة عن task 1 150 كلمة وصف عن جداول وبيانات وأشكال بيانية، task 2 250 كلمة في مواضيع عامة.
1. Task 1يتذاكر من LIZ قولاً واحداً ، task 2 من Simon وممكن تزود تشوف نصائح من LIZ فيه لو حبيت.
2. الكتابة مرهونة بكثرة التعرض لنماذج الكتابة الأكاديمية والتعود على طريقة كتابتها وألفاظها وأسلوبها. اطبع الإجابات النموذجية من المواقع الأربعة واقرأها بتركيز وافهم الجمل اتركبت ازاى عشان تقدر تستعمل الألفاظ والتراكيب اللغوية بكفاءة فى مكانها المناسب، فى الأول هتحاول تحفظ وتقلد لكن مع الوقت هتقدر تفرق بين كل ستايل في الكتابة.
3. الكتب دي صغيرة ملخصة وعبقرية وبتنجز جداً.
- 10 مواضيع نموذجية فى كل منهم. وبعد الموضوع تحليل لجانب من الكتابة ، واحد بيحلل vocabulary وآخر الجرامر وتالت ال vocabulary بتعمق. اقرأ المقالات بماركر و خد ملاحظات و فصل كل جملة مكتوبة إزاى واحفظ الكلمات والتراكيب الى بعده والمرادفات هتفرق معاك حتى فى speaking. لما تخلصهم هتفاجئ من تراكم الألفاظ والتراكيب الى اتعلمتها وهتنعكس في الكتابة.
4. متأجلش انك تبدأ في الكتابة مهما حدث، الوقت الى مخصصه ليها اديهولها واتمرن واكتب زى ما بتدى للفروع التانية بالضبط. وفى الأول اتمرن انك تكتب نماذج كويسة ومع الوقت ركز انك تحسن ادائك فى الوقت لأنه نقطة مصيرية ، وعلى قرب الإمتحان محتاج تكون اتعودت تخلص فى الساعة بالثانية.
5. صحح المقالات الى بكتبها، خلى أصدقاء ليهم خبرة اللغة او الامتحان يصححولك او مجموعة بتذاكروا سوا والموقع ده كويس جدا بتصحح عليه مقالاتك، http://www.ielts-blog.com/
6. ده كورس مجاني للكتابة لتحقيق band score 7 مجربتوش لكن يقال انه شافي ووافي ، وأى مصدر زيادة فى الكتابة لا يقال له لأ طالما منجز وفيه جديد
- وده كتاب مهم غير مجاني ، وحد ابن حلال رفعه ربنا يكرمه
7. في كلمة هتتكرر كتير وهى synonyms المرادفات ، الامتحان بيحتاج انك تكون عارف مرادفات مختلفة للكلمات العادية عشان تجيب سكور عالي مثلا big = enormous = tremendous= huge كل ما عرفت أكتر سكورك هيتحسن فى كل الفروع لأن الامتحان كله مبنى على استعمال مترادفات مختلفة لنفس الكلمة فى الأسئلة والإجابة. أكيد مش مطلوب تبقى عارف كل الكلمات، لكن كل ما تشوف كلمة فكر يا ترى ايه معانيها التانية وخلى الموقع ده مفتوح جنبك ودور فيه فى ثوانى على مرادفات.
8 . الشئ القاسي جدا ان spelling الغلطة فيه بتطير الإجابة كلها، فاهتم جداً انك تصلح لنفسك كل ما تغلط، وتركز فىه.
9. هتحتاج تفتح قاموس انجليزي انجليزى جنبك عشان لو احتجت حاجة، (http://www.onelook.com/) هو سرنا كمترجمين موسوعة قواميس هتجيبلك كل ما يتعلق بالكلمة من كل القواميس المتاحة عالكوكب بضغطة، استمتع وانسى قواميس العربي خالص لكن لو اتزنقت ولازم عربي يعني إليك http://www.almaany.com/
8. المحادثات
1. اقرأ نماذج أجابات عشان تتعود على شكل الإجابة الجيدة وازاى تدى تفاصيل اكتر ونوعية الأسئلة وهكذا. واحفظ كلمات academic من المصادر دي
كتاب Ielts speaking مع المجموعة المرفوعة فوق.
2. اتفرج على امتحانات حقيقية عاليوتيوب ده فرق معايا جداً بتتعود على الامتحان وتقلد الاجابات وتشوف الناس من دول مختلفة بتجاوب ازاى بغض النظر عن اللكنة خالص.
3. اتمرن ما استطعت لأن عقدة اللسان وسرعة التفكير دى ملهاش حل، خلى صديق يمتحنك وجها لوجه بجدية كأنك فى الامتحان، ويفضل يكون بيفهم فى اللغة عشان يصحح أخطائك.
وممكن تتمرن مع Natives عالموقع ده ITALKI
4. أهم نصيحة في المحادثة انك تتعلم تتكلم بدون توقف، وتستخدم كلمات مستواها عالي مش عامية. وحضر إجابات للأسئلة المتوقعة، مش تحفظ اجابات لكن تفكر لو اتسألت سؤال بتحب الأكل برة ولا في البيت هقول ايه، جهز كلام فى دماغك ولو حبيت تاخد لنفسك notes مفيش مانع بس مجرد ملاحظات ( بحب البيت ، عشان نضيف، ولمة العيلة، وبحب اطبخ ، وبوفر فلوس ، وهكذا , واتعلمت كام كلمة جديدة فى موضوع الطبخ ده لو اتسألته، وطبعا بالانجليزى).
5. طول ما انت قاعد تذاكر من ورق وطول يومك شغل جنبك حاجات انجليزى لطيفة خطابات اوباما و سياسيين وشخصيات عامة مثلا، هتفرق معاك فعلا و هتعودك على نمط الكلام الفورمال وتدخلك فى المود، الحركة دى بتفرق عن انك تسمع برامج كاملة او افلام او اغانى لان الى هتسمعه فى الامتحان خطابات ومحاضرات اكاديمية. اكتب english speeches بس عاليوتيوب والنتائج هتبسطك حتى خطابات الأمم المتحدة وسفراء النوايا الحسنة وخطابات المشاهير فى حفلات التخرج في الجامعات الدولية المواضيع هتكون ممتعة ومش هتمل وهتقلب موجة دماغك على إنجليزى.
9. بعد ما اتمرنت على كل جزء على حدة هنبدأ نحل امتحانات كاملة بالوقت كأنك فى الامتحان بالضبط بدون مقاطعة. الامتحانات من 1 ل 12 ( اطبع من 7 أو 8 ل 12لأن قبلهم نظام قديم )
10. يوم الامتحان بقى يكرم المرء أو يهان، وانت بتتمرن حط نفسك في جو الامتحان عشان تتهيأ ومترتبكش يومها.
قاعة ضخمة فيها ناس كتير ووارد دوشة تحصل لأى سبب وحركة، بتقلع ساعتك ( والله ما أعرف ليه ) معاك اقلام رصاص بس (هم بيدوك قلم رصاص واستيكة وبراية ) بس هات استيكتك وقلم اسنان لو بتنجز بيه و بطاقتك او باسبورك الى حجزت بيه ، لو نسته مش هتدخل. بتسيب حاجتك كلها برة وتدخل.
- بعد ساعة listening بتاخد بريك خمس دقائق الى يروح الحمام تغسل وشك وهكذا، و بعد ساعة reading مفيش خروج هتاخد خمس دقائق راحة في مكانك.
#- speaking بيكون في يوم منفصل قبل أو بعد الامتحان بيوم. لو امتحانك فى القاهرة (فقط) وجالك المعاد قبلها بيوم وحابب تأجل، متروحش الامتحان وروح عالتحريري عادى وعرفهم وهيدوك معاد بعد يومين مثلاً فى الفرع الرئيسي في العجوزة وهتدفع 100 جنيه رسوم.
- الامتحان كله ربع ساعة من أول ما تدخل وكتير من الممتحنين مصريين، البس كاجوال عادي وبلاش جو البدل فورمال او كلاسيك كفاية. والنصيحة الذهبية ، هي ( متتكلمش بسرعة، مبتبطلش كلام إلا ما يوقفك، اوزن نفسك كده واتقل -بالبلدي يعني- ولو غلطت صلح لنفسك، واعتبرها مقابلة شغل فورمال بالإنجليزي مش أكتر، الثقة بالنفس والأتيتيود مهمين أوى واتكلم برواقة شديدة فى مواضيع زى الطبخ والخروج والشوبينج والابتسامة عريضة على شفتيك) انا امتحنت على الأحذية وبحيبها بكام ومنين وعندي كام واحد والله كنت هتشل ومش عارفه أقول ايه بس نرغي باتزان العارفين وخلاص.
_ نصيحتى الخاصة جداً: نام كويس جدا جدا وياريت تتعود تصحى بدرى قبلها بأسبوع الامتحان 8 الصبح وبتبقى هناك من سبعة ولو كائن ليلي زى حالاتى هتعانى جدا عشان تتعود تركز فى وقت دماغك بتبقى متعودة تنام فيه. دى نصيحة اتقاالتلي وكان تمنها غالى بصراحة ، الامتحان مجهد ذهنيا وبيحتاج هدوء اعصاب وتركيز عالى جدا وفوقان ونشاط. اليوم الى قبل الامتحان خده راحة وروقان كده وكل حاجة حلوة ومتعملش حاجة خلاص، الامتحان الى بيتوتر فيه هو الى بينقص ، الى بيجيبوا سكور بيشوا بمبدأ ( ثابت الخطوة يمشى ملكاً).
- ثانيا: لو عندك أى حالة صحية لازم تبلغ عنها قبلها ، ويكون معاك دواك، ولو تعبت بشكل يمنعك من أداء الامتحان أصر انك تثبت ده ومتمتحنش وتأجل. للأسف الى حصل معايا ان ضغطى غير مستقر فكان مرتفع 160/110، ورفضوا يأجلولى رغم قياسهم بنفسهم، وسككتت واخدت الدوا على أمل اتحسن فسبب هبوط حاد 70/50. طبعا كنت بحل وانا لا شايفة ولا سامعة ولا قادرة أكتب وعايزة أخلص وامشى وخلاص. يعنى اتمسك بحقك الخلاصة.
#عالهامش الامتحان سهل ومش مخيف ولا تعجيزي على العكس أنا أجرؤ أنى أقول انه سهل للى ذاكر واستعد، الى اتدربت عليه هتلاقي زيه كأنك كنت بتحل في البيت فيما عدا ان ده الامتحان فعلاً خلاص، فدع التوتر جانباً وذاكر وبس. الشئ المهم الاستعداد له انه الحساب بالمللي وإن الإنجليز مبيهزروش وطريقة التصحيح دقيقة جداً جدا وكل ما تحاول توصل للمعايير دي وتركز عليها وتحضر في إطارها، الوضع هيتحسن بإذن الله.
# النتيجة بتبان بعد 13 يوم بالضبط، لو امتحنت سبت هتجيلك رسالة الخميس الى بعد خميس اسبوع الامتحان عالظهر بالنتيجة. وبخالص التوفيق. وادعوا لي دعوتين نُرزق بهم أداء أفضل المرة الجاية وواسع الرزق والتوفيق.
#عالهامش، الناس الى فى المنصورة، الماتيريال كاملة مطبوعة وسوفت في مكتبة الفجر مكانها ( أمام بوابة ستاد الجامعة بيوتي سنتر الجمال المغربي ، ادخل الشارع ده المكتبة عالشمال بعد خطوتين ، والفايل باسمي على الجهاز الى جنب كولدير المياة )
- الناس الي في القاهرة، الماتيريال في مدرسة شيخ العمود في العباسية برج التطبيقيين ، فى بارتيشن (أرشيف المدرسة) الفولدر باسمي كذلك.
الله المستعان D:
ردحذف