Chevening Scholarship Arabic Guide

Chevening Scholarship

رغم تعدد المصادر وخبرات الخريجين المتاحة عن منحة chevening للدراسة في بريطانيا وجدت إن مازال هناك مساحة للإضافة والمساعدة بتقديم الدليل التالي لرحلة التقديم للجائزة الأكاديمية شديدة التنافسية. اخترت أنه يكون بالعربي وبأبسط لغة ممكنة، وهيتم تحديثه كل عام بالتزامن مع كل دورة جديدة للمنحة في شهري سبتمبر وأكتوبر. وفي نهاية المقال هتجدوا مصادر مهمة للاستزادة مقدمة من لجنة الاختيار ومن خبرات الخريجين. 

تمهيد ضروري

منحة تشيفننج اكتسبت سمعة شدة الصعوبة الحالية لسبب بسيط  وهو نسبة التنافسية العالية جداُ، طبيعى لما المتقدمين يكونوا آلاف عدد المرفوضين هيكون كثير جداُ، لكن ده مش مؤشر استحالة نجاح أو فشل أو تحول المنحة لأسطورة. بعبارة أخرى: جهز لها زى أى منحة واعرض أفضل ما عندك و fight for appeal. وعلى عكس منح أخرى للملكة المتحدة أو بلاد أخرى، أبلكيشن تشيفننج بسيط ومباشر وسهل وواضح كفاية وفي عدد لا نهائي من المصادر بيشرحه ويخدم عليه. 

- أبلكيشن تشيفننج بيحتاج الآتي فقط في كل مراحله : 1. statement of purpose المكون من أربع مقالات (القيادة_التشبيك_الدراسة في بريطانيا_وتطلعاتك المهنية ) 2.ذكر خبراتك العملية السابقة (تطوعية أو احترافية) 3. تملأ بياناتك الشخصية كلها وشهادة تخرجك فقط مفيش أى أوراق مفيش أى إثباتات مفيش أى اختبارات ولا أى رسوم تسجيل مطلوبة. 4. خطابين توصية في المرحلة الثانية من المقابلات الشخصية 5. قبول نهائي في جامعة واحدة عالأقل في المملكة المتحدة لو نجحت للوصول للقائمة النهائية من المرشحين في شهر يوليو 6. شهادة لغة انجليزية آيلتس أو توفل كمان يطلب  لو نجحت في الوصول للقائمة النهائية من المرشحين في شهر يوليو( ألغى شرط شهادة اللغة بداية من عام 2020 خلال وباء كورونا فيروس). 

مين من حقه يقدم ؟

مهم تراجع شروط المنحة من هنا قبل ما تقرر تقدم عالمنحة. ولمراجعة سريعة يجب أن تتوفر فيك الصفات التالية: 

1- تكون مواطن حامل لجنسية إحدى الدول المشمولة بالمنحة ( كلهم متاحين عالموقع ولازم تختار منهم عشان تقدر تقدم).
2- ترجع بلدك لمدة سنتين بعد انتهاء المنحة (والشرط إلزامي في العقد)
3- أنهيت كل مراحل دراستك في undergraduate degreeبحيث تكون مؤهل لدراسة درجة ماستر في الجامعات البريطانية.
4- عندك خبرة عملية سنتين في تخصكك المهني أو التطوعي (ما يعادل 2800 ساعة).

مراحل التقديم 

من المهم الرجوع لموقع المنحة أولاً للإجابة على أى سؤال أو ارتباك، والموقع منظم بشكل كافي جداً للإجابة عن كل الأسئلة الممكنة. هنا خط زمني واضح للتقديم بوضح كل مرحلة ايه المطوب فيها وايه المتوقع بعدها.

1- في أواخر أغسطس وبداية سبتمبر كل عام بتفتح المنحة أبوابها للتقديم وتغلق في بداية نوفمبر
2- بعد استبعاد الطلبات غير مستوفية الشروط ( راجع شروط المنحة من هنا) بتنعقد لجان المراجعة ما بين متتصف نوفمبر لمنتصف ديسمبر وبتقيم كل مرشح وترسل النتائج للجنة الاختيار في بلدك. 
3- مرحلة القائمة القصيرة في فبراير، لجنة الاختيار في السفارة البريطانية في بلدك بتختار عدد من المرشحين وتدعوه للمقابلة الشخصية. وفي المرحلة دي تحديداً بتقدم خطابات التوصية وشهادات التخرج (خطابين فقط من مرؤوس سابق أو أستاذ أكاديمي).
4- المقابلة الشخصية ما بين مارس وإبريل كل عام. 
5- إعلان نتائج المنحة ف بدايات يونيو كل عام
6- منتصف يوليو هو الموعد النهائي لتقديم شهادة القبول بجامعة واحدة عالأقل من اختياراتك الثلاثة قبول نهائي ( وبداية من سنة 2020 ألغت المنحة شرط امتحان اللغة خلال أزمة كورونا فيروس، لكن كل الجامعات ما زالت بتطلبه كشرط أساسي)
ولو وصلت هنا مبروك welcome to the tribe 

نبدأ منين ؟

نبدأ من online application على موقع المنحة https://www.chevening.org/scholarship/egypt/. سجل وأنشأ بروفايل خاص بيك وأملأ بياناتك الشخصية والمطلوب منك في هذه المرحلة ( البيانات الشخصية + درجتك التعليمية+ خبراتك العملية السابقة تطوعية أو مهنية+ المقالات الأربعة). وهنا بتوصي تشيفننج دايماً بضرورة مراجعة دليل المنحة قبل التقديم لتجنب الأخطاء الشائعة . الدليل هنا

كما هو واضح بعد تسجيل بياناتك الشخصية، بتسجل كل شهاداتك الدراسية الجامعية وما بعدها (البكالوريوس \الليسانس\ ماستر\دبلومة) 

أسئلة شائعة : س: ازاي أحسب ساعات العمل وأعرف انها سنتين ؟
ج:  مبتحسبش، السيستم بيحسب اوتوماتك. سجل جهة العمل ومنصبك الوظيفي وعدد ساعات العمل الأسبوعية( راعي انك تحط ساعات منطقية واحترس من المبالغة، تشيفننح بتقبل لحد 60 ساعة لو بتشتغل دوام كامل وعمل تطوعي جنبه)  ونوعه وهو قطاع حكومي أم خاص وهيطلع النتيجة.
س: بكتب الشغل بس ولا التطوع؟
ج: بكتب الاثنين
س: هل لازم أكون اتخرجت أو عدى سنتين على تخرجي ؟
ج: لازم تكون في سنتك الدراسية الأخيرة، وهتكون اتخرجت قبل الديدلاين 

في الجزء الثاني من الدليل هنتكلم باستفاضة عن نصايح كتابة المقالات الأربعة وهي الجزء الأهم من الأبلكيشن. لكن دعنا نمر سريعاً على باقي مكوناته قبل ختام هذا الجزء. 

اختيار الجامعات

ايه درجات الماجستير المدعومة من تشيفننج ؟

1. درجة ماجستير، بدوام كامل، تبدأ في فصل الخريف\سبتمبر، تدرس داخل حرم الجامعة في أى مكان بالمملكة المتحدة، لا تقل عن تسع شهور ولا تزيد عن 12 شهر، ولا تحتاج لمواد تحضيرية قبل بداية الدراسة. 
2. وبالتالي الكورسات التي تدرس عن بعد، غير المؤهلة لدرجة الماجستير، في أى مكان خارج بريطانيا، تبدأ في فصل يناير الدراسي، تحتاج كورسات مواد تمهيدية أو لغة .. كلها غير مؤهلة للحصول على منحة تشيفننج.

أقدم إزاى على الجامعات؟

التقديم على الجامعات عملية منفصلة تماماً، هتختار أى 3 كورسات على النحو التالي:
1.  3 كورسات متشابهة المجال في نفس الجامعة
2. 3 كورسات متشابهة المجال في 3 جامعات مختلفة
3. 3 كورسات مختلفة العنوان في جامعات مختلفة

تقدر تختار الكورسات بسهولة من موقع المنحة من خلال محرك البحث التالي  وقبل ما ننتقل للجزء الثاني مهم تكون عارف أنه عملية التقديم عالكورس منفصلة تماماً عن المنحة ولا تتدخل فيها بأى درجة. بعد اختيارك للكورسات بتكون في فرصة لتغييرهم لو اتصعدت للقائمة القصيرة وخلال الانترفيو. بعد الانترفيو مفيش فرصة تغيير، وهتكون مطالب بتقديم القبول النهائي من الجامعة في منتصف يوليو لو وصلت للقائمة النهائية من المرشحين كما أسلفنا أعلاه.

التقديم لكل جامعة بيكون من خلال online application على موقعها، مشابه في مجمله لأبلكيشن تشيفننج وبيتم كله online وتقدر دايماً تتواصل مع كل جامعة من خلال البريد الالكتروني المتاح على مواقعهم الي بيردوا عليه بسرعة وسهولة.

الأوراق المطلوبة  

1- باسبور صالح الاستخدام، هتحتاج تسجل رقمه في الخطوة الرابعة من الابلكيشن.
2- شهادة التخرج (شهادة مؤقتة لو حديث التخرج)
3- لو بالفعل عندك قبول غير مشروط \ أو مشروط من جامعة تقدر تسجله مباشرة
4- اسماء الموصين بك refrences وبياناتهم الشخصية فقط. لو عندك خطابين توصية جاهزين وهم أقوى وأفضل ما عندك تقدر تسجلهم لو تحب بداية من اللحظة دي.

بنهاية المرحلة دي هتكون انتهيت من المرحلة الأولى من chevening application ويبدأ الانتظار حتى منتصف فبراير مرحلة إعلان القائمة القصيرة.

Application Essays

كل سؤال من الأسئلة الأربعة بيتسهدف يستكشف جانب من قصتك الشخصية ذو صلة بمحددات المنحة وما تبحث عنه كقيم عليا في مشاريع خريجيها المستقبليين. تشفيننج بعكس القطاع الواسع من المنح الدراسية عالساحة بتركز على مهارات المرشحين العملية و تأثيرهم في المجتمع كأولوية قصوى قبل أدائهم الأكاديمي- الغالب على فلسفة منح التمويل الدراسي-. وهتلاقي ده منعكس في سؤالي  القيادة والتشبيك ومدى أهمية الصفتين والمهارتين بعينهم لمقدمي المنحة. وإلحاقاً بالصفتين الأساسيتين بيأتي سؤال خطتك العملية \ career plan عشان يقيس رؤيتك لحياتك، الواقع بيؤكد أن مفيش شخص يقدر يحدث تغيير وتأثير في محيطه ومجتمعه بدون رؤية واضحه للمستقبل و بدون ما يمتلك أدوات مهارية تسمح له يمشي بثبات تجاه تحقيق أهدافه وخطته دي. وبييجي السؤال الرابع، ايه خطتك للدراسة في بريطانيا وهدفك من المنحة يقيس الثلاث مساحات مجتمعين في أول اختبار مباشر لقدرتك على التخطيط ووضوح رؤيتك لبكرة، واستبصارك بمساحات قوتك وخبرتك ونقاط ضعفك المعرفية والعملية الي هتسدها المنحة مباشرة.

في ضوء الفهم السابق، نقدر نتعامل مع الأسئلة الأربعة أنهم مصممين بدقة لغربلة كل المرشحين الذين ينقصهم الأصالة والجد والموهبة والعمل الدؤوب، وهنا هيكون تركيز الجزء الثاني من الدليل: نتعرف على محددات كل سؤال من الأربعة، ونستعرض أساليب كتابية مختلفة تساهم في ان كتابتك تعكس أفكارك وتعرض خبرتك بالشكل الأمثل \ و هنفرد جزء أخير لاستعراض التراكيب الكتابية الي تضر طلبك وتقلل من جودته. 

- من الأسئلة اللي بتتسال كتير في السياق ده: هم في chevening بيدوروا على ايه ؟

السؤال ده سهل ممتنع للغاية، لا أحد يملك إجابة قاطعة ليه، لكن في قدر كافي من الإشارات الواضحة جداً أن تشيفننج منحة بتكلل جهود profile citizems فتسمحلهم ياخدوا خطوات أوسع في الى بيسعوا في تحقيقه بالفعل، ولذا مهم اعتبار فلسفة المنحة في قرارك بالتقديم _ تسائل لو جاهز وعندك طريق واضح وخطوات ملموسة وإنجاز فيه يخليك قار عالمنافسة). المنحة مقدمة في إطار تعاون رسمى بين حكومة بلدين من 35 سنة، فهي بتدور على طلبة يكونوا واجهة لبلدهم وللمنحة طول السنين الجاية، محتاج يشوف إنجاز فعلي اتحقق ع الأرض، أو مهارات وإمكانيات بتقول انك بتحقق الى سعيت له سابقا وانهم لو ادوك الفرصة دي هتلتزم بحلمك وتجرى وراه. محتاج الإجابات الي جاوبتها على سؤال القيادة تكون بتوجه لهم الرسالة دي كذلك " أنا عملت وقدرت وهعمل وهقدر وانا استحقها".
 

احكي قصتك، وأوجد صوتك الخاص

هنبدأ نستعرض نقاط عامة للمقالات كلها ثم النقاط المرتبطة بخصوصية كل مقال على حدة. 

الأسئلة ذو شكل مقالي كأى statement of purpose  ومساحتها مجتمعة كبيرة عن أى خطاب دافعية تقليدي -(2000) كلمة- أي أنها تحتمل الحكي والسرد- في المضمون بالطبع-، اعتبر انك بتحكي قصة حياتك لناس متعرفكش لكن لها هدف انك تعرض جوانب محددة من حياتك دي، والجوانب دى محددة سلفا( مفيش نموذج إجابة وكل واحد بيعبر عن نفسه وطريقته لكن في معايير زى الدقة وترتيب الأفكار وترابطها وانسيابيتها وتماسك المقال ككل). ملاحظاتي القادمة هي خلاصة من مراجعات applications ومن ملاحظة أداء الزملاء الي نجحوا في القبول بالفعل، وهشير في نهاية التدوينة لمصادر من لجنة قراءة المقالات والاختيار في تشيفننج نشرت في أماكن مختلفة تضيف إلى وتكمل ما سأذكره بالفعل.

نقسم المقالات إزاي ؟

 1-   مفيش شكل ولا نموذج أبداُ للإجابة ولا تصور مثالي للى مفروض تكتبه، لكن التصور الواقعي، من وجهة نظري، انك زى أى essay writing بشكل عملي 500 كلمة في كل مقال مش كتير فالسؤال محتاج ببساطة : مقدمة حوالي . 100-150 كلمة ومثالين و خاتمة سريعة بحيث تسمح أن الجزء الأكبر من مقالك يكون لشرح المثال الي بيدلل على امتلاكك المهارة المطلوبة و بيبيع المهاردة دي للمانحين.

2- متحكيش عن نفسك في المطلق اعتقاداتك فيها وسيب شغلك يحكي عنك تاني، 500 كلمة مش كتير عشان يحتملوا كلام إنشائي، شخبط في ورقة على جنب واكتب كل أفكارك وبعدين هات قلم أحمر واختار من الأفكار دي، المثال الأقوى الى يبرهن على مهارتك هو فقط الي تضمنه وكون كريم في حذف كل ا هو دونه أو ذكي في تضفيره في المقدمات والهوامش للشرح.

3- من الضروري نمهد أنك تستخدم خلال الEssays كلها A Star Approach . في كل فقرة في كل مقطع في كل جملة ضع هذا المخطط أمامك وجاوب عن الأسئلة التالية : ايه هو الموقف الي هحكيه؟ ما هي التحديات\العقبات\ المهمة المطلوب إنجازها\؟ كان دوري ايه ؟ وماذا كانت النتائج؟. لو التزمت بالنمط العملي في السرد هيكون صعب تتوه أو تحكي قصص غير مترابطة.

4- اعمل نسق وسرد، اعتبر كل مثال / فقرة منهم قصة: انت محتاج تقولى ايه النشاط ده اصلا ، في جملة افتتاحية ودورك فيه كان ايه وايه مسؤولياتك، ثم تحكي، باختصار شديد، عن العقبة الى واجهتك gap / problem/ challenge، والطريقة الى حليتها بيها دي هى the contribution that mark your leadership/ networking skills. وجملتين كمان قصيرتين فيهم نتائج عملك ده في شكل أرقام تغيير ملموس، كسبتوا قضية، حصل تغيير للائحة، ساعدتوا مجموعة المستهدفين يتعلموا مهارات كذا، قدروا يلاقوا شغل وهكذا.

Leadership Question

سؤال القيادة يعتبر أهم سؤال على الإطلاق لأنه هيحكي مفتتح قصتك ، وهيركز على أهم قيمة بتبحث عنها منحة تشيفننج تحديداً، ولأنه فيه مقدمتك ولأن الي مش هيكمل أول سؤال مش هيكمل الأبلكيشن بالفعل.

• المقدمة: اجعلها خاطفة اجعلها لا تنسي! 

 انا مش محتاج أعرف انت اتخرجت ودرست ايه بالضبط بالتفصيل، ولا أحلامك وتفاصيل حياتك الشخصية ولا صعوباتك الي تجاوزتها ولا اترشحت لايه قبل كدة لأنك حكتلي ده في خبراتك العملية وشهاداتك التعليمية، ولأنك لو هتحكي أى جانب من دول لازم تذكره عشان تربطه مباشرة بإجابه السؤال. فكر ( أنا بعرف نفسي في الواقع ازاى، ايه هدفي، ايه اكثر مميزاتي، ايه علاقة ذلك بالمنحة والكورسات الي بقدم عليها) والكتابة بتحتاج شخبطة كتير، فطبيعي تفكر لحد ما تلاقى اجابة متماسكة ساعتها تتكتب. انا محتاج أعرف عنك أهدافك النهائية وتخصصك ودورك المجتمعي الي بتأديه، تعرف بيه optimum momentum في رحلتك فتخليني طول ما أنا بتفرج على جوانب من حكايتك أفتكر انت بتعمل وهتعمل ايه في حياتك وازاى هيأثر في حياة الناس.

• جسم المقال نفسه

الاقتراح الوسطي الي يناسب أغلب الناس أنه محتاج قصة إلى قصتين من حياتك العملية يدللوا إنك صاحب مهارات قيادية. (واحدة بس مش في صالحك لأنها ممكن تقول ان دى بس الخبرة الى عندك، واكتر من 2 مش هيكون في مساحة تشرحهم وهيكون النتيجة مش متماسكة والمقال مهلهل). ثم خاتمة 50 كلمة - مثلا- تقفل بيها المقال بشكل بيأكد ويلخص على كلامك. لو ذكرت أمثلة كتير مش هتشرح أي منهم بشكل كافي وهينتهى المقال ملخبط، وتقدر تحكي مثال واحد لكن انت محتاج يكون قوي جدا جدا لأنك بتغامر انك حكيت حكاية واحدة بس ممكن متقنعهمش أو تحطك في مقارنة مع الى في النقطة دى بس من المتقدمين، لكن افتح لنفسك سكك أوسع من غير تضييق بحكي جانب أخر من مهاراتك أولى.

يعني ايه مثال يوضح اني عندي الإمكانيات الى تأهلني للاستفادة من المنحة وازاى اشرحه؟؟

يعني خبرة خضتها - خبرة محددة- لما أسست النشاط الفلاني، لما ترأست القسم الفلاني، لما بدأت مبادرة كذا، لما عملت حملة كذا في محافظتي - مش مطلوب منك تكتب موضوع تعبير عن يعنى ايه قائد ويعني ايه قيادة و يعني ايه حب الوطن إطلاقا- في حوالي 200 كلمة وأكثر قليلاً بتقول انا عملت كذا، في الظروف الفلانية، وكان دافعي كذا، ومن خلاله نجحت في تحقيق كذا، ويا سلام لو قلت ارقام دخلنا فلوس جالنا متقدمين كسبنا قضية سجلنا متسربين من التعليم بنسة إجمالية كذا. ادي دليل على حكايتك دي. وبس خلاص مش محتاج انت تشرح أو تثبت أى حاجة أفعالك حكت عنك بالفعل، لكن ممكن في السياق ده تعيد التأكيد على هدفك الى ذكرته في المقدمة بطرق أو بأخرى. تذكر STAR approach 
مثال بسيط
Intro: I was driven by the analysis of human psychology in the context of societies, to .... , that urged me to pursue a whole quest into how people are shaped by personalities.
Example: My experience in the organization ( Name it), allowed me to experience ( .. some skills) that showed me the potentiality of *analyzing people looking into their societies* ( this is your goal of the whole application mentioned in the intro again), So I did .( so and so), consequently happened ( so and so numbers and statistics) By this I knew I was able to achieve my goal ( which is asserted above).

على هذا النسق العام تكون الكتابة، أنا مين وجاى هنا أعمل ايه بالضبط، وببيع لكم ايه بالضبط ونجحت قبل كدة في ايه تحديدا حتى بصوا عملت ايه ؟ لكن مهم أوضح هنا أنه الاقتراح ده لا يعني أنه الشكل الوحيد أو الأفضل، طرق الكتابة وأساليبها كتير لكن معايير الدقة والترتيب والكلام المباشر الموصل للهدف معكوسة ببساطة في الأسلوب ده. اكتب بالشكل الي يريحك ما دمت قادر تدمج فيه المعايير وتجيب عالسؤال وتلاقي صوتك.

Sources on the leadership question 

https://www.chevening.org/news/bealeaderblog/
https://www.chevening.org/news/what-leadership-qualities-do-you-need-to-become-a-chevening-scholar/

Networking Question

أولا: السؤال محتاج انك تشرح كونك قائد ومؤثر في مجتمعك باستخدام مهارة التواصل او تكوين شبكات علاقات علي مستويات مختلفة، تماما زى سؤال القيادة، تثبتلي من خلال أمثلة من خبراتك العملية انك بتقدر تعمل علاقات ناجحة تفيدك في تحقيق أهدافك العملية ( سواء شغل احترافي أو تطوعي ). ثانيا: الفرق بينه وبينه سؤال القيادة، انك في الأول بتحكي أمثلة من خبراتك بتقول انك صاحب مبادرة/ قادر على إحداث تغيير فعال، عن طريق انك انت الى بتعمل التغيير بنفسك ( من خلال المثال الى ضربته يوضح ده)، وفي التشبيك ، انت احدثت التغيير انك استعنت بشبكة علاقاتك لتحقيق الهدف.

- مثال: أنت أسست نشاط كذا الى قدر يساعد أطفال الشوارع في محافظتك وحققتوا نجاح كذا، وذكرت أرقام أو دلالات نجاحك ده، وخلال النشاط ده كنتوا محتاجين أدوات معينة مش متاحة في مكانك، وانت السنة الى قبلها رحت شاركت في مؤتمر save نظمته فاتعرفت على جهات مانحة ونشطاء في المجال فتواصلت معاهم في الموقف ده فقدروا يوصلوك بناس يوفروا الأدوات فنجحت الحملة /النشاط/ المشروع في هدفه وحققنا 1 ، 2 ، 3 .

مثال ثانِ: لما سافرت البلد كذا لحضور دورة تدريبية عملت شبكة علاقات كويسة مع ناس في منظمة فلانية، و الشبكة دى ساعدتنى لما شغلى احتاج يوصل ل grass root organizations في البلد دي وقدرت اكون حلقة وصل لتنفيذ المشروع الي نجح في تحقيق اهدافه الى هي كذا وكذا وكذا وساهم في ده وجود شبكة العلاقات دي.



ثالثاً: المقدمة والخاتمة مهمين للغاية لأن ممكن تكون خبراتك كويسة جدا لكن الرغي الكتير في المقدمة يخلى المراجع ميكملش المقال، وسط آلاف المتقدمين الواضح المركز بس هو الى يستحق فرصة انه طلبه يقرأ. المقدمة محتاجة افتتاحية عامة لكن عنك انت، متكتبش كلام عن تصورك للتشبيك اكتب خبراتي المختلفة علمتنى ان التشبيك بينفع في كذا لو نفعني في دخول مجالات كذا او حققت من خلال المهارة دى نجاحات كذا، والى هى هتتكلم عتها في الفقرتين الجايين.

رابعاً: (مهم جداً) في خاتمة السؤال ده، في نقطة احنا لسه مجاوبناهاش وهى هتستفيد ازاى من درستك في انجلترا في التواصل وتكوين علاقات. المطلوب ببساطة مش انك تقولهم انتوا ناس زى الفل وعندكم تعليم ومنظمات، اه هو ده الى هتقوله في الاخر بس ازاى ؟ ادخل في التفاصيل على طول ، انا بدرس فيزيا وانتوا عندكو مؤسسة كذا ومنظمة كذا والعالم الفلانى والمركز الابحاث الفلاني، ولما ارجع مصر بقى هستغل الشبكة الى هكونها عندكم تانى في شبكاتى الى في مصر بالفعل الى هى كذا وكذا الى ذكرتهم.

للتلخيص (لا يوجد نسق كتابة واحد ولا نموذج تتبعه، لكن في قواعد كتابة عامة ودى الى ذكرت بعض منها، نظم المقال مقدمة وخاتمة وجسم مقسم لفقرات، 500 كلمة لا تحتمل اكثر من فقرتين في جسم المقال. اشرح المثال كويس واهتم بذكر أدلة عملية، واختم باستفادتك من انجلترا في التواصل).

Study in the UK

1. اختيارك للكورسات عامل مباشر في قبولك من عدمه. محتاج تلاقي الكورس المناسب ليك والمتوافق مع خبراتك فعلاً عشان تقنع المانحين أن السنة دى انت جاهز للمنحة تماماً. مفيش دليل تختار كورسات على أساسه لكن الأفضل إنك توازن بينهم، تختار جامعة Highly ranked وجامعة متوسطة القبول، لأن لواخترت اوكسفورد وكامبردج و LSE محتاج إما الابلكيشن بتاعك يقول انك تنين فعلا وهتتقبل في واحدة منهم ع الأقل، وإما انك هتضيع فرصتك ف القبول لأنك هتبدو داخل مخاطرة لو قبلوك في المنحة ومتقبلتش في الجامعة. وبناء عليه اختار الجامعات بعناية مش أى 3 اختيارات وخلاص. مش ضرورى يكونوا كلهم مختلفين ولا يكونوا كلهم حاجة واحدة، لكن الطبيعي يكونوا في نفس المجال.
   
   
2. نسق المقال نفسه محتاج يتنظم كما ذكرنا، مقدمة وخاتمة و 3 فقرات للجامعات. مقدمة عن ليه اخترت انجلترا للدراسة، مهم تقولهم الدراسة في انجلترا عموما هتفرق معاك انت ايه مش عشان نظام تعليمكم ورانك الجامعات ( حط بصمتك انت وخصص الأمرعن فرق ده في حياتك وكاريرك انت ).  قبل ما تبدأ كتابة لازم تكون عملت بحثك كويس جداً عن الجامعة وعن كل جامعة عن المواد ومراكزها البحثية، وعن الأساتذة فلما تكتب عن سبب اختيارك تكون justified ، وبالمثل عن المدينة الي هتعيش فيها لمدة سنة كاملة و التجربة كلها.
   
   
3. مهم تكتب عن كل جامعة لوحدها فقرة تشرح أسباب اهتمامك بالجامعة دى تحديدا، وخاتمة عن هتستفيد بيها ازاى عموما. أو تقسمهم بالمدينة أو التخصص الدقيق او الفروقات بينهم.  الكلام كل ما كان مخصص اكتر كل ما كان أقرب للواقع وكل ما عممت كل ما معرفتش تعمل ايه ولا تكتب ايه وحسيته كلام مكرر. افتح موقع الجامعة واقرا عن كل تفصيلة في الكورس ووريهم انك عملت شغلك كويس، الكورس ده مميزاته ايه تحديدا نقطة او اتنين عن الكورس عن الأساتذة عن الجامعة ولو كانوا شبه بعض اتكلم في كل فقرة عن نقطة مختلفة يعني، كل ما هتقرأ كل ما هتلاقي ايه الى يتكتب.
   
   
4. النقطة الأكثر أهمية: للمقال زى أي  statement of purpose، محتاج تربطه بخبراتك السابقة و خططك المستقبلية في كل خطوة.
   
   
   

    EX: I need to study ... which build up on my previous experience in.... And The course theoretical  approach on ... will equip me with the needed knowledge to my next career step  name it directly-.
   
   
5. أكثر الاخطاء الشائعة الي شفتها في السؤال ده، هو الكلام الإنشائي، عن انجلترا و الجامعة أو عن تصوراتك عن التعليم، ادخل في الموضوع على طول هدرس كذا عشان انا عندى خبرة سابقة كذا وهتفرق في مستقبلي في كذا وشكرا ليكم انكم هتدونى الفرصة دى. المقدمة تحتمل انك تمهد بشكل يعبر عنك بردو، استغل كل حرف انك تحكى حاجة عنك وانك تقولهم انا استاهل اخد الفرصة دى ( بالأدلة والبراهين). الكلام المرسل عن استحقاقك والإضافة الى هيعملها المنحة ليك، تاني هات دليل ، ادينى خطة وتصور انت عاملة، الكلام المستقبلي بيبدو مبهم كدة وهثبته ازاى ده ( حط خطة، انا ناوى لما ارجع اروح كذا واعمل كذا وهكذا وتكون خطة منطقية مش قفزة مستحيلة) وازن بين الممكن والتحدي باختصار.

  Career Plan

السؤال ده، أزعم- من قراءة ما يقرب من 150 أبلكيشن، ومن تجاربي وتجارب الخريجين الي بنشاركه- أنه بيفرق في قبول وعدم قبول ناس كتير كذلك لأن ممكن نقدر نكتب عن انجازاتنا السابقة لاننا عارفينها لكن بنتلخبط ازاى اكون مقنع في خطة مستقبلية، وازاى ادى دلائل على حاجات انا ناوى أعملها في حياتى ومرهونة بالمستقبل والاحتمالات؟

السؤال هيكون ناجح لو

1.  خطتك المستقبلية ليها علاقة بخبراتك السابقة الي ذكرتها في أول سؤالين. بتبنى عليهم وتكمل، زى انك تتخصص في نقطة دقيقة في مجال انت اشتغلت فيه، او عايز تساهم في حل مشكلة مجتمعية في المجال، بس أخدت خطوات فيها سابقا وهتطورها بعد الماستر.
2. خطواتك منطقية وممكن حدوثها ومبنية على بعضها. هتدرس صحافة فهرجع أقدم على المكان الفلاني واتخصص في الملف الصحفي الفلاني لحد ما اكتسب مهارات تخلينى اتولى مسؤولية مؤسسة كذا او اعمل مبادرة كذا.

هيكون غير ناجح لو

1. حطيت خطة مستقبلية بعيدة عن خبراتك السابقة ومرتبطة بالماستر بس، او مش مرتبطة ارتباط مباشر بالاتنين، زى انك تقولهم انا هعمل كارير شيفت بعد الماستر ( هيصدقك ازاى وانت مخدتش خطوات تجاه الهدف ده ملموسة لحد ما قدمت؟ ).
   
   
2. - هيكون غير ناجح لو قفزت قفزات غير منطقية زى انك هتعالج السرطان في مصر، ولا هتحل صراع سياسي ولا هتبقى رائد الكيموثيرابي في الشرق الأوسط. ده كلام عام مش هو الى هتعمله لما ترجع من المنحة فعلاً.
   
   
3. لو ملوش علاقة مباشرة بالكورسات، زى أنا هدرس صحة عامة عشان بحبها وهرجع اشتغل في صناعة الدواء ؟ طب ما تدرس دواء ؟ و واحدة من أهم شروط المنحة انك ترجع مصر سنتين بعد ما تخلص، فلازم توضح ان عندك خطة في مصر وده خط سيرك لانه هيقلل من مصداقيتك لو ظهر انك ناوى تعمل أي حاجة في اى بلد تانية وهيقولوا ده هيروح يسافر وميرجعش ( مهم تعكسلهم التزامك).

شكل الكتابة 

1. قسم المقال لفقرات ( أمثل اقتراح تواترت عليه النصائح أنه يكون خطتك اول ما ترجع، خطتك بعدها بكام سنة، واى خطوات طويلة المدى).
2. مقدمة إجمالية وحاول تخليها ملفتة للانتباه وقوية تأكد تانى على هدفك العام و تأثير المنحة المباشر في الوصول لهدفك ده.
3.  وهذا شديد الأهمية ، كل نقطة تكتبها في الكارير تربطها بخبراتك السابقة وبالى هتتعلمه في الماستر، وتوضح تأثيرها على محيطك ( ده الى بيدوروا عليه).
EX: I plan to join an NGO in the upon my arrival as an ( environment researcher) . With the knowledge and techniques I will learn throughout the course of ( ... ) I will be able to promote the (sustainable energy field research... ) in my country , leading to .... This will enable me to take the next step in my career I started in
( your previous experience).

 الشكل ده مجرد اقتراح سريع لكنك محتاج تربط بين خبراتك السابقة والكورس وخطتك المستقبلية باختصار ومباشرة. ( مش بقترح عليك تكتب الى انا كاتباه لكن تسترشد بترتيب الأفكار)  راجع الى كتبته واسال نفسك كذا مرة ده منطقي ولا لا، هو ده حقيقي لأنه انت محتاج تقتنع بالى كاتبه عشان تقدر تقنعهم بيه. وأخيراً من ملاحظة المقبولين السنوات السابقة و دفعتي فعلا ، فارق جدا ان الناس مختارة كورسات مرتبطة بخبرتها الفعلية ومقدمة نفسها انها هتاخد كارير مبنى على الكورسات دى.

4. خاتمة قوية كذلك تلخص بسرعة ليه الدراسة وقبولك في المنحة هو الخطوة المنطقية الى هتأهلك انك تكون فاعل ومؤثر (لأن ده الى بيدوروا عليه). استغل الخاتمة لربطها بهدفك وطموحك وانك تفكر القاريء بصوتك وبصمتك الخاصة، خليه يفتكر المقدمة ويلاقي خط ناظم بين بدايتك وخاتمتك.

ماذا الذي لا يجب أن يكتب عنه ؟ 

1. تحكي عن مهاراتك الاجتماعية في الأسرة والشارع وبين أصحابك
2. تحكي عن تصوراتك ل ازاى الإنسان يعمل علاقات ناجحة

3. تقول انك محبوب في شغلك و مديرك بيثني عليك
4. قصص شخصية عن شطارتك في التواصل، ده مش دليل على انك قادر على التواصل، اديني دليل عشان أكمل الابلكيشن واروح السؤال الي بعده.

5. تكتب مقدمة تاخد نصف السؤال وتتكلم بسرعة عن خبرتك العملية
6. تذكر مثال رائع وقوى لكن متشرحوش كفاية
7. تذكر أمثلة كثير جدا وكلهم كانك بتعمل قائمة انجازات، فالمانح مش هيفهم انت عملت ايه ولا تأثير ده ايه في البيئة المحيطة بيك.
8. تشرح باستفاضة مثال ضعيف- ظنا منك انه أفضل- وتسيب المثال التانى مكتوب بشكل ضعيف.
9. تكتب بلخبطة وتحكى عن نقطة وتنقل للى بعدها وترجع للأولى.
10. تكون سلبي وتقول عندنا مشاكل وتقف، اه عندنا مشاكل بس انا اتدخلت بكذا كمحاولة للحل
11. متراجعش الانجليزى والجرامر والمسافات و punctuation كويس جدااااً. مش مطلوب منك تكون ممتاز لكن استعين بحد، الانجليز دقيقين بشكل هيخوفك. ( لكن ده مش معناه انك تسيب المضمون وتركز في شكل الكتابة، انا كنت خايفة كدة بردو، لكن عادى لو فاتتك حاجة لو غلطت في حاجة، بس مترميش الابلكيشن من غير مراجعة لو ناوى على قبول).
12. متكتبش اقتباسات في الابلكيشن أبداً، أبداً.
13. حضّر وابحث كفاية وكن دقيق وتفصيلي في كل خطوة. مهم جداً كل ما كنت دقيق كل ما كنت ناجح، كل ما تحس انك مش عارف كاتب ايه وشكله كلام تابوهات ارجع ذاكر اعمل سيرش بتاعك كويس، ودورعلى تفاصيل في النقطة دى هتلاقى الى تكتبه، عشان تكتب كلام ذا معنى ويقتنع بيه حد محتاج تكون تعبت في البحث بتاعك ومتكتفيش بالمعرفة العامة. ( المعرفة العامة تبدأ بيها البحث فقط مش تذكرها في حجتك القوية للقبول).

أخيرا: تشيفننج مش مستحيلة، ومفيش مجالات مبياخدوهاش، السنوات الثلاث الآخيرة حوالى ثلث المنحة تخصصات دقيقة جدا في الهندسة والكيميا والجيولوجيا والطب، وتشيفننج مش للمعارضين والصحفيين، كما تقول الأساطير، مش عايزة أصدمك وأقول أن أكثر من ثلث المنحة الى نصفها ( وده رقم حقيقي كل سنة) للعاملين في الحكومة نفسها بدرجات أجهزتها الإدارية، ومن المعلومات المتداولة يعرفها اليعض في الدوائر الضيقة، أن كونك شغال في وزارة حكومية بيكون داعم لقبولك مش العكس لأنك على قرب من مراكز صناعة القرار. ما أعنيه ان مفيش نموذج ولا مكان بيقبلوه ومكان لأ، الأمر منوط كله بكونك عندك الإمكانيات الكافية للحصول على الفرصة دي. ((( انا ببيعلكم شطارتي الي حققتها سابقاُ، وفي السؤالين الجايين، بقولكم خطتى العملية الي بتثبت انى عارف انا عايز ايه وهستغل  الفرصة ازاى)))).

Career planning 

https://www.chevening.org/news/how-could-a-chevening-scholarship-help-you-achieve-your-career-goals/

 More Sources about the Essays

https://www.chevening.org/news/2020applications/

https://www.chevening.org/news/
https://www.chevening.org/news/reading-committee-feedback-for-applicants/

More General Sources 

https://thescholarsjourney.wordpress.com/

https://www.facebook.com/watch/live/?v=1476233562570106&ref=watch_permalink

https://www.facebook.com/marj3com/videos/333490787898115

 بالتوفيق بإذن الله وجعل الله لكل مجتهد نصيب ، ونشوفكم في The Excel, London